hiram-pirenena vocale hiram-pirenena instrumentale1/ Fanekena an’AndriamanitraAndriamanitra Andriananahary, dia Jehovah – eny, Andriamanitra Andriananahary, dia Jehovah. Ry Jehovah ô, Andriamanitry ny razanay, tsy Hianao va no Andriamanitra any an-danitra? Eny, Hianao no manapaka amin'ny fanjakan'ny jentilisa rehetra, ary eo an-tànanao ny hery sy ny fahefana, ka tsy misy mahasakana Anao. “Ianao no mandahatra ny andro sy ny fotoana; Ianao no manaisotra mpanjaka sy manangana mpanjaka”, araka ny Soratra Masina. Fa an'i Jehovah ny fanjakana; ary manapaka amin'ny firenen-tsamy hafa Izy. Lehibe sy mahatalanjona ny asanao, Tompo ô, Andriamanitra Tsitoha, Mahitsy sy marina ny làlanao, Ry Mpanjaka mandrakizay.
2/ Fitalahoana/ Fangatahana Omeo rariny izahay, Andriamanitra ô, ary alaharo ny teninay haharesy ny firenena tsy misy famindram-po; Andriamanitra ô, mifona aminao izahay, mba sitrano re Madagasikara. Hifonanay aminao ireo Malagasy. Hifonanay aminao ireo manampahefana. Mifona aminao izahay, mamelà ny helok'ity firenena ity araka ny halehiben'ny famindramponao;
Mifona izahay fa tsy hataonay fitaovana fotsiny ny anaranao masina mba hanatanterahanay ny sitraponay sy ny politikanay. Te hibebaka izahay, izany hoe hiala amin’ny ratsy fanaonay ka tsy hinia hanao izany intsony, ary tena hitady anao amin’ny fo rehetra fa tsy amin’ny molotra ihany. Mahatezitra Anao ny mpihatsaravelatsihy. I Jona aza raha nitory hoe: “Rehefa afaka efa-polo andro, dia horavana i Ninive” (Jona 3:4).
Dia nino an'Andriamanitra ny mponina tao Ninive, ka nanapa-kevitra ny hifady hanina ary nitafy lamba fisaonana hatramin'ny lehibe ka hatramin'ny kely. “Ary nony efa ren'ny mpanjakan'i Ninive izany, dia nitsangana niala tamin'ny seza fiandrianany izy, ka nanaisotra ny akanjom-boninahiny, dia nisarona lamba fisaonana sady nipetraka tamin'ny lavenona” (Jona 3:6).
Aoka koa isika hibebaka, hiantso fifadian-kanina, hitafy lamba fisaonana ary hipetraka amin’ny lavenona. Na ny lehibe na ny kely, na ny mpiandraikitra ao amin’ny fanjakana na ny vahoaka. Angamba hahita famindram-po eo anatrehan’Andriamanitra ihany isika.
3/ Ny amin’ny fitiavana an’Andriamanitra Andriamanitra no atahory, ary ny didiny (ny Baiboly) no tandremo, fa izany no tokony hataon’ny olona rehetra. Andriamanitra tsy azo vazivazina, fa izay afafin'ny olona no hojinjany na amin’ny firenena, na amin’ny olona tsirairay. Hahatsiaro ka hiverina ho amin'i Jehovah ny faritany rehetra; Ary hiankohoka eo anatrehanao ny fokon'ny firenena. Fa an'i Jehovah ny fanjakana; Ary manapaka amin'ny firenena Malagasy Izy.
4/ Fanoloran- tena Koa avaozinay etoana ny fanoloran-tenanay ho an’i Kristy ilay Mpanjaka mandrakizay. Atolotray ho anao ry Jesoa Kristy Tomponay i Madagasikara. Mba ho anao tanteraka tokoa, ka tsy zaraina amin’ny hafa. Fa Andriamanitra saro-piaro tokoa ianao; Ary ny voninahitrao tsy omenao ny hafa. Arianay ny fanompoan-tsampy rehetra eto amin’ny firenenay fa tsy sitrakao izany, mampahatezitra Anao izany. Fa Ianao no niteny fa ny firenena manompo sampy, dia ny tavanao no hanandrina azy. Koa aiza no halehanay raha mitsanganko-fahavalonay Ianao Jehovah o!
Hanompo sy hanaiky Anao izahay amin’ny fo manontolo, fa tsy amin’ny molotra sy ny fomba ivelany fotsiny. Ho Anao Irery i Madagasikara, ary i Kristy ho an’i Madagasikara. Vady ara-dalàna ka tsy mijangajanga intsony, araka ny voasoratra hoe: “Eny, hofofoiko ho vadiko amin'ny fahamarinana ianao. Ka dia hahalala an'i Jehovah” (Hosea 2:22).
“Enga anie ka hatahotra an'i Jehovah sy hanompo Azy ary hihaino ny feony ka tsy handà ny didiny ianareo, fa samy hanaraka an'i Jehovah Andriamanitrareo ianareo sy ny mpanjaka izay manjaka aminareo” (1 Samoela 12: 14). Koa araka izay lazain'ny Fanahy Masina hoe: "Anio, raha hihaino ny feony hianareo, Aza manamafy ny fonareo tahaka ny tamin'ny fahasosorana … " (Salamo 95: 7-11).
Amena!
5/ Vakinteny - Izahao Levitikosy toko 26: Fitahiana sy ozona. - Izahao Nehemia toko 9: Ny fivorian’ny olona rehetra hanetry tena noho ny fahotany sy hanao fanekena hanaraka ny lalan’Andriamanitra. - Izahao Jona toko 3: Ny nitorian’i Jona teny tao Ninive.
Adiresy E-mail: info@madagascar4christ.com |